 |
| Nagbaha' ha Taft |
Iyabutan
na isab kami sin ulan matigda’ diy ha hula’ Manila. Ulan matigda’ agaran sin
hangin makusug. Di’ isab mabilang unus in kaybanan, sa sibu’ da in guwa’ niya:
Maglakab-baha’ na isab ha kaybanan lugal; masuspend na isab in klas sin
kaiskul-iskulan (magkalapay ra sambil kami ha medschool; ampa bukun langug bang
masuspend in class pasal kami bata; iskul da in magmula). Di’ magkaubus in
hangaka tahun sin wayruun lumabay ulan dakula’ pa hula’ ini. Gaid sin bunnal in
bayta’ sin kamáasan sin awn tuud mulka’ ha hula’ ini.
Di’
kapaglangugan in hula’ ini bang dumatung in bagyu agaran pa ulan matigda’ iban
paglakab-baha’ ha karán-dánan. Magtrapik na isab. In manga tau sa da lumubung
pa baha’ yaun nag-aanud ha supaya maka-untas hadja sin dán. Di’ ra maunu bang
malanu’ in tubig yaun nag-aanud, sa’ ná kayngatan tan a, yaun na katan in
kalummi’-lummian naglamud-lamud. Sa’ unu isab in mahinang ta? Duwal bang kaw
mabaya’ matuwg ha sawm sisilungan. Sa’ da kaw umuntas. (Manghugas mayan marayaw
pagdatung pa báy.)
Katumtuman
ku bang mag-ulan matigda’ ha Lupa’ Súg paglakaban da isab bihayni. Mag-anud in
tubig dayng ha taasan (kagimbahan) sampay pa manga San Raymundo iban Martirez
yadtu, di’ na ma karaganan mutul iban sikad-sikad. Sa’ para kaku’ magma pa in
ha hula’, di’ lumugay malawa’ da (maray’ diy’ isab ha manga tulay yadtu. Allahu
Alam bihaun, kalu narayaw na). Sa’ in tubig baha’ diy ha Manila ini bukun siya
“brown” laung sin anggalis, magma biya’ abuhun pa itum madtu. Na di’ tan a kaw
suysuyan mayta’.
Nakasulay
na aku imuntas sin dán liyalakaban diy ha Manila ini. Wayna aku mahinang, sa’
da umuntas pasal magtitigda’ pa in ulan. Lumugay maglanguy na kami kaagi. Na
imuntas na in bagay mu. Di’ tuud manjari in tawmpa’ kum bunnal sa. Sa’ ku
diyakdakan nakatuw (haha). Na bihayni na in kahálan sin hula’ ini bang
magdatung in bagyu (June pa September).
 |
| Limubung na in bata'-bata' ini ha baha' |
Bang
mag-ulan matigda’ ha hula’ kalasahan, gamman bayaan aku mamaygu’ ulan.
Katumtuman in waktu bata’-bata’ pa sin magdágan-dágan kami iban mga bagay ku,
iban kappal-kappal namu’ hiyuhukutan (in kappal-kappal manjari tsinelas,
galun-galun, bunut, luluunan miniral, atawa kan dahun malaggu’). Sa’ dayndiy ha
Manila? Sulay kaw mamaygu’ ulan, dugayng in tubig niya. Mahaggut ubus bukun, gamman
kaw isab kalummian.
Maglulugay
aku riy ha hula’ ini, magduruhun in pagtumtum ku pa hula’ ku. Sa’ subay ku ra
isab hipatumtum pa baran ku sin yari aku ha hula’ ini, nanuntut ilmu’, bukun pa
baran ku sa’ pa hula’ ku kalasahan. Sari na madtu mabutas aku pa manga
kalasahan ku ha lawm pila tahun. In shaa Allah dumatung da in waktu makabalik
da aku kanila. Ha waktu yadtu bang dumatung na in shaa Allah awn na hikatabang
ku. Sári na malumuk mabasa’ sin ulan matigda’. Sári na malubug mabasa’ in
tawmpa iban pantalun sin baha’. Sári na mangatul sin lummi’ sin tubig baha’
(hehe). In mga ini lumabay ra. Dumatung da in waktu kabalikan ku in ulan
matigda’ ha hula’ ku kalasahan.
Comments