Bismillah.
Ha pagsilak na mán sin matasuga, in lindum sin dum limabay inut-inut na simawa. Alhamdulillah, hambuuk adlaw na isab in sung tumagna’. Hambuuk adlaw, diyuhal kátu’ sin Tuhan Bayng ulungun, ha supaya marayaw natu’ pa in manga salla’, mapabuntul in manga bingkuk, iban kalanuan in manga bakas kiyalummi’an.
Ha pagbati’ ku kaina maynaat, pagsiyb ku pa tandawan, masi-masi pa tigidlum in langit ha taas, wayruun pa in si’nag sin sugha. Sa’ misan bihadtu na malindum, in sawa sin manga kabáy-báyan ha tilibutan namu’ iban sin manga kabildingan naglalanjangan na; sambil in hibuk sin manga sasakatan nagdaragan misan lisag upat pa sin maynaat, hambuuk panumtum káku’ sin wala’ na tuud aku ha hula’ ku kalasahan. Yari na isab aku ha hula’ daira Manila, tumukbal sin miyaksud ku riy: mag-iskul.
 |
| Manila skyline |
Bang hadja mahinang bunnal in manga tagaynup, marai’ matug na aku balik. Pasal ha taygaynup ku, yadtu aku ha hula’ ku. Ha tagaynup ku, nag-aagad kami iban manga sila kalasahan ku, hi Inah ku, in manga taymanghud ku. Ha tagaynup ku, wayruun na aku dugaing kasusahan pasal in katan naagad na ha kabayaan namu’ katan. Sa’ biya’ da isab sin tagaynup ku pagtuwgan, nakabati’ da aku. Biya’ sapantun si’nag sin suga, timampal káku’ sin yari na in kasabunnálan ku biháun. Wayruun na aku ha lawn tagaynup ku, kailu.
Amun tuwy (3) dum limabay yaun, didtu pa aku ha bay natuwg ha tilam-tilam piyagsasawhan ku iban manga manghud ku. Pagduwm hambuuk, didtu na aku ha taas kappal, nagpa-anud ha dagat. Pagbalik didtu na aku ha bay sin inaun ku, ha Samboangan (wayra aku nakatuwg pasal mahibuk in manga magbubustak pasal New year nila). Kabii, yari na aku ha bilik-bilik namu’, isa-isa ku ra iban Electric fan ku.
“In pilangka bulan limabay biya’ ra sin kahapun yaun,” Agi ku pa baran ku bat aku di’ na magdrama diy ha guwa’-guwa’ sin bilik namu’ ini, “Hangkanda, manjari ta iyanun in pila bulan pa lumabay ini biya’ da isab sin kunsum dumatung da, In shaa Allah.” Kalagihan ku ra kuman in magsabar; tumagad sin tiyap-tiyap si’nag sin sugha sampay dumatung in adlaw yadtu amun makabalik na isab aku pa Lupa’ Sug, kasilayan na isab in hula’ ku iban sin sila manga kalasahan ku. In shaa Allah. In shaa Allah.
Dai’-dai’ pa yaun, kiyta’ ku na in si’nag sin sugha ha subangan kimanat na pa kalangitan. Nagpahati sin hambuuk adlaw na isab in timagna’, Alhamdulillah. Iban subay magsaddiya na aku madtu.
(Minum kita niyu kahawa. Hehehe.
In Post ini hilamud ku ha Series “Limang Minuto” Bahasa Sug version. Sa’ limabi aku ha 5mins kasi masarap in topic. “Masarap” biyah kahawa iban tinapay taga mantakilya hehe. Magstory2 man kita niyu balik.)
Salam Kasilasa!
Comments