Bismillah
In tiyap-tiyap panagnaan subay tuud pagsaddiyahan. Mataud jumatu amun dih ta kaingatan, bang kita wayruun nakasaddiya asal. Ha wala’ pa dimatung in kunsum, subay ha biháun pa kaingatan mu na bang unu in tudjuhun mu. Ha supaya bang dumatung na in adlaw yadtu, di’ nakaw maglawag pa sin dán, bang harap kaw pakain. Subay ra isab pagsaddiyahan in kaibanan manga prublima manjari jumatu ha susungun, ha supaya makasaddiya da isab kaw.
Biya’ da isab sin kabuhi’ iban kamatay. Ha wala’ pa dimatung in kamatay subay saddiya na kita bang unu in hinangun bang in waktu yadtu dumatung na. Tumtumun ta sin in kita ini dih da laung maglugay diy ha dunya ini. Misan pa ayn biya’diin in daya mu, in taud sin sinapang mu, in taud sin lahasiya’ mu, in kusug sin kawasa mu, tantu in katan yan ha panagnaan sadja. Di’ da lumugay, dumatung da isab in hinapusan niya. Malawa’ da sila katan. Biya’ sin dunya ini, biya’ da sin kabuhi’ mu, tantu awn hinapusan niya.
Asal in tiyap-tiyap panagnaan awn hinapusan. Duwal da kuman in tunggal Tuhan Mahatinggi Makawasa in way panagnaan, wayruun hinapusan. Tattap kumakkal ha ala mini iban sin sumunud kaniya.
Biháun ha kahaba’ tumagna’ in adlaw, tumtumun natu’ sin tantu dumatung da in hinapusan niya. Ha kahaba’ pagsilak sin suga’ ha subangan, tantu dumatung in pagsadlup niya. Tantu in tiyap-tiyap hipag-anak makakinam kamatay. In katan sin panagnaan awn hadja hinapusan niya. Hangkan subay di’ natu; tuud luppasun in kahaba’ sin waktu diyuhal katuh sin tuhan ha wayruun kapuwsan. Mamintang kitaniyu, mamandang. Mamikil sin unu in hikarayaw sin parasahan natu’ bukun hat ha dunya ini, labi apdal sampay pa adlaw susungun ha adlaw wayruun na dugaing makatabang katu’ duwal in baran iban ammal natu’.
WaAllahu ‘Alam.
Salam kasilasa.
-Anak iluh
Comments