Ha kahaba’ waktu magpaka-atud aku pa kalauran sin dagat, ha hula’ naka atawa ha dugaing lugal, di’ ku tuud kahawiran in makauyum ha pangatayan ku. Biya’ aku sapantun amuin bata’2 ampa nakabalik pa pipihan hi inah niya. Ha laum jantung ku in kahanung, kasanyang… Daran ku magkaiyan ha baran ku, “bunnal sa, in dagat ini biyah da isab sin kabuhi’ ku…”
In kabuhi’ ta biya’ da sapantun sin dagat yaun;
Anud madtu, anud mari. Di’ kaingatan in tubtuban ta bang hain humundung. Mataud pangasubu dih ta pa kaingatan sambungan; mataud lalabayan, sung ta pa untasun. Maladju-malawak pa in sungan ta, in manjari ta tukasun. Mataud indaginis ha lauman niya, sibu’ da hikatabang atawaka makamumula.
In kabuhi’ ta biya’ da sapantun sin dagat yaun;
Awn waktu ha laum kahanung, di’ maghibal-hibal. Awn waktu in kita magpa-agad na hadja ha pakain-pakain na in anuran niya. Awn waktu isab ha laum harubiru, ha laum alun malaggu’ sa’ ta atuhan. Ha laum badju, atawa unus dakula, makahanggaw manglubu sin kabuhianan iban mga miyumuhut ta.
In kabuhi’ ta biya’ da sapantun sin dagat yaun;
Dugaing-dugaing in walna’ niya. Awn malihaw masawa. Awn malummi’ nalubug na. Awn gaddung na sin halamanan niya, awn bilu na sin lingkat iban lanu’ niya. Awn malanu’ masarap tugpaan payguan; awn malummi’, mabahu’ nahipu’ sin lassun iban basura. Awn waktu itum bitu-bitu; awn waktu namumula na biya dugu’ imaanud madtu.
In kabuhi’ ta biya’ da sapantun sin dagat yaun;
Subay kaw maingat magad ha taas-baba’ niya. Bang kaw manuytuy mamaspad madtu, tantu laulun kaw; hapusan kaw napas, ampa kaw malunud, malimun niya. Subay kaw maingat magpalantup ha tiranan niya; subay da isab kaw tumunga, gumuwa kaniya bat kaw makanapas marayaw. Ayaw kaw magpalimun, magpahaylan halingkat niya, tantu ha sungun malunud da kaw kaniya.
In kabuhi’ ta biya’ da sapantun sin dagat yaun;
Awn hadja hinapusan dungguan niya. Ha tiyap-tiyap pagtulak, dumatung da kaw pa sangkaan, hinapusan sin tulak mu; tantu subay ra kaw numaug daing ha pagmaadjul mu. Dih kaw manjari magpa-anud na hadja salama-lama ha lauran niya; dih lumugay bang kaw di’ dumunggu’, madaub da in bangka’ siyasakatan mu.
In kabuhi’ ta biya’ da sapantun sin dagat yaun;
Awn ginhawa niya. Awn pus-paidda niya. Subay ta tuud ayaran marayaw. Ayuputun marayaw. Di’ ta siya pasaran, luppasun ha hinang-labayan wayruun kapusan.
Ayari in kabuhi’ mu.
Ayari in dagat diyhil kaymu sin Tuhan.
Salam Kasilasa pa katan!
(English translations will follow, In shaa Allah)
Comments