Napulak-kanat

Bismillah.

Mataud na isab in jimajatu biháun subay dihilan natu’ waktu hátihun. Ha hula’ masi-masi in habal sin pagsaggaw-tau atawa kan pagkidnap. Ha pila adlaw puas sin bulan Ramadhan nagsunud-sunud isab in pagbustak madtu-mari. Timampal da isab in habal sin pagtakaw siyn sin manga tau ha parinta Pilipinas (bunnal way kita lamud kanila, sa’ lapay ra kita sin kakahinang ini). Magsusung da isab in adlaw sin pagbilma’rup sin parinta pilipinas iban sin tumpukan MILF. Ha habal ba’gu yan nagpamahalayak na sin kalimayahan in Maas Nur Misuari iban MNLF ha hula’. Ha hula’ malayu’ isab biya’ sin Egypt dimatung na in waktu pag-atubang sin tau raayat iban sin sundalu sin parinta nila… Di’ aku makarihil pamikilan (opinion) ha tiyap-tiyap habal nasabbut, mataud pa aku masi di’ kahátihan. Sa ha katán sin nasabbut yadtu, hambuuk da in matampal káku’: napulak-kanat in raayat Muslimiyn biháun.

Bunnal awn manga habal marayaw magdatung, sa’ kamatauran labi makasusa. Ha biháun kiykita’ ku in raayat muslimiyn, luba na in manga kabataan, di’ na kayngatan bang hisiyu in agarun. Bang mu agarun in hambuuk mamuklasi kaw ha hambuuk. Gamman na hikaganap sin pagpulak-kanat sin ummat natu’. Bukun ka in patumtum kátu’ sin Tuhan Mahamulliya ha Ayat niya ha Qur’an:

“Wa’tasimuw bihablillahi Jamiaw wa la Tafarrakuw…”

“Gunggung kamu pa lubid (Qur’an) sin Tuhan Allah magsama-sama maghambuuk, iban ayaw kamu mapulak-kanat…” (Surah Al-Imran :103)

Mayta’ di’ kitaniyu makahibal bilang hambuuk ummat? Mayta’ di’ kitaniyu makalawag hambuuk tunggal nakura’? Mayta’ kitaniyu masi-masi napupulak-kanat? Ku’nu baha; dumatung in waktu mahambuuk na kitaniyu katán?

In manga pangasubu ini amsi-masi ha lawm pangatayan ku. Kalu awn baha’ kaniyu makarihil sawa, makajawab kanila?

Salam Kasilasa.
Anak iluh


Comments

Popular posts from this blog

Applying for UP College of Medicine

Pre-Departure Reflections

Y'know Lapu-Lapu? He is not a Filipino!